«Freedom Broker»-ը կպարգևատրի «Ոսկե ծիրան» փառատոնի լավագույն կարճամետրաժ ֆիլմի թիմին

«Ոսկե ծիրան» կինոփառատոնի փակումն այս տարի կանցկացվի Կինոյի տանը և կնշանավորվի Ատոմ Էգոյանի «Օրացույց» ֆիլմի ցուցադրությամբ, որն այս տարի դարձավ 30 տարեկան։
Մինչ Էգոյանի ֆիլմի ցուցադրությունը, «Ոսկե ծիրանի» պաշտոնական գործընկեր «Ֆրիդոմ Բրոքեր» (Freedom Broker) ընկերությունը «Կորիզ» կարճամետրաժ ֆիլմերի մրցութային ծրագրի լավագույն մասնակիցներից մեկին կպարգևատրի հատուկ մրցանակով՝ ֆիլմի անձնակազմին տրամադրելով 1 մլն դրամական պարգև՝ հաջորդ նախագծի իրականացման համար։

Նշենք, որ այս տարի «Ոսկե ծիրան» կինոփառատոնը Երևանում կանցկացվի հուլիսի 9-ից 16-ը՝ «Հետ նայելով գալիքին» (Looking back to the future) կարգախոսով։ Կինոփառատոնն ավանդաբար հանրությանը ներկայացնում է մրցութային ֆիլմեր ամբողջ աշխարհից, այդ թվում՝ Կաննի, Բեռլինի, Վենետիկի և այլ կինոփառատոների լավագույն ֆիլմացանկից։ Այս տարի կինոփառատոնի շրջանակներում Երևան էին ժամանել Կաննի կինոփառատոնի Ոսկե արմավենու 2 դափնեկիրներ՝ Ժան-Պիեռ Դարդեն և Լյուկ Դարդեն եղբայրները,
Վենետիկի կինոփառատոնի «Ոսկե առյուծ»-ի դափնեկիր ճապոնացի ռեժիսոր, սցենարիստ, դերասան Տակեշի Կիտանոն, Վենետիկի կինոփառատոնի «Ոսկե առյուծ»-ի դափնեկիր, ֆիլիպինցի ռեժիսոր Լավ Դիասը,օսկարակիր պրոդյուսեր Ջերեմի Թոմասը, պորտուգալացի ռեժիսոր Պետրո Կոստան,ղազախ ռեժիսոր Սերգեյ Դվորցևոյը, Կաննի կինոփառատոնի հետխորհրդային տարածաշրջանի գլխավոր խորհրդատու Ժոել Շապրոնը և այլ հայտնի հյուրեր։